आणखी एक वादळ! हवामान विभागाचा या राज्याला अलर्ट

भुवनेश्वरः पश्चिम बंगालच्या उपसागरात ओडिशाच्या समुद्र किनारपट्टीला पुन्हा वादळ धोका निर्माण झाला आहे. ओडिशाला लागून असलेल्या भागात वातावरणात वादळी स्थिती निर्माण होत असल्यामुळे ओडिशाला अलर्ट जारी केला गेला आहे. हवामान विभागाचे विभागीय अधिकारी परिस्थितीवर नजर ठेवून आहेत. हवामान विभागाने ओडिशाला आज हा अलर्ट जारी केला. समुद्रात ०.९ किमी ते ७.६ किमी दरम्यान दक्षिणेच्या बाजूला वादळी स्थिती निर्माण होत आहे. पुढच्या तीन दिवसांत ते उत्तर पश्चिमेच्या दिशेने पुढे सरकेल, असं हवामान विभागाने स्पष्ट केलं आहे. 'अम्फान'मुळे झाले होते नुकसान गेल्याच महिन्यात बंगालच्या उपसागरात तयार झालेल्या अम्फान महाचक्रीवादळामुळे पश्चिम बंगाल आणि ओडिशा या दोन राज्यांना मोठा फटका बसला होता. या वादळामुळे मुसळधार पाऊस आणि वाऱ्यांमुळे पायभूत सुविधांचे मोठे नुकसान झाले. वीज पुरवठा खंडीत झाला. अनेक घरांची पडझड झाली. झाडं कोसळल्याने वीज पुरवठा यंत्रणा कोलमडली होती. 'अम्फान' वादळामुळे पश्चिम बंगालमध्ये ७२ हून अधिक नागरिकांचे प्राण गेले. १९९९ नंतर आलेले म्हणजे २१ वर्षांनंतर प्रथमच हे महाचक्रीवादळ धडकले. अम्फान वादळ राष्ट्रीय आपत्ती घोषित करावी, अशी मागणी विरोधकांनी केली होती. पश्चिम बंगाल आणि ओडिशाला मदत अम्फान वादळामुळे पश्चिम बंगालचे अतोनात नुकसान झाले. पश्चिम बंगालच्या मुख्यमंत्री ममता बॅनर्जी यांच्या आवाहनानंतर पंतप्रधान नरेंद्र यांनी नुकसाग्रस्त भागाची हवाई पाहणी केली होती. यानंतर केंद्र सरकारकडून पश्चिम बंगालला १ हजार कोटींची मदत जाहीर केली गेली. यानंतर पंतप्रधान मोदींनी ओडिशातील नुकसानग्रस्त भागाचीही पाहणी केली होती. यानंतर ओडिशाला ५०० कोटींची मदत जाहीर केली गेली. महाराष्ट्राच्या किनारपट्टीला 'निसर्ग'चा फटका अम्फान महाचक्रीवादळानंतर महाराष्ट्राला या महिन्याच्या सुरुवातीला निसर्ग चक्रीवादळाचा तडाखा बसला. ताशी १२० ते १४० किमी वेगाने वारे वाहिल्याने अनेक घरांचे पत्रे उडाले. घरांची पडझड झाली. अलिबागजवळ हे वादळ धडकल्याने सर्वाधिक फटका रायगड जिल्ह्याला बसला. मुख्यमंत्री उद्धव ठाकरे यांनी यानंतर रायगड जिल्ह्याला १०० कोटींची मदत जाहीर केली.