बिहारमध्ये भाजपला मिळालेल्या यशात मोदींचा करिष्मा दिसून आला. मात्र त्यापेक्षाही अधिक परिणामकारक ठरलं ते भाजपने पडद्यामागे केलेलं नियोजन.
पंतप्रधान नरेंद्र मोदींच्या नेतृत्वाखाली भाजपने बिहारमध्ये ऐतिहासिक आघाडी घेतलीय. भाजपच्या या कामगिरीसाठी 3 एम फॅक्टर कारणीभूत ठरलेत. 

फॅक्टर क्रमांक 1 - नरेंद्र मोदी
खरं तर सलग 15 वर्ष सत्ता उपभोगलेल्या नितीश कुमारांना अॅन्टी इन्कम्बसीचा फटका बसेल असे अंदाज सर्वांनीच वर्तावले होते. पण पंतप्रधान नरेंद्र मोदी यांनी एनडीएच्या प्रचाराचं नेतृत्व करत सभांचा धडाका लावला. त्यामुळे जेडीयुच्या जागा घटल्या, तरीही भाजपने सरशी साधली.

फॅक्टर क्रमांक 2 - महिला
नितीश कुमार यांना सायलेंट वोटर असलेला महिला मतदारांचा मोठा पाठिंबा आहे. याशिवाय केंद्र सरकारने महिलांसाठी जाहिर केलेल्या उज्वला योजना, मोफत धान्य योजना, आणि पक्की घरे यासारख्या योजनांमुळे बिहारमधला महिला मतदार एनडीएच्या पाठिशी उभा राहिला. 

फॅक्टर क्रमांक 3 - मुस्लिम मतदार
बिहारमध्ये 17 टक्के मुस्लिम मतदार असून आजवर हा एकगठ्ठा मतदार लालूप्रसाद यांच्या राजदच्या पाठिशी होता. पण यंदाच्या निवडणुकीत हा मतदार विविध पक्षांमध्ये विभागला गेल्याने त्याचा फायदा एनडीएला झाला. 

बिहारच्या निकालानंतर भाजप हा बिहारमधला एक मोठा पक्ष म्हणून समोर आलाय. त्यामुळे इथून पुढची भाजपची बिहारमधली पावलं अधिक आक्रमक असतील हे नक्की.

आता बातमी रामदेव बाबांच्या पतंजलीची. कोरोनावर औषध म्हणून लॉन्च केलेल्या आणि नंतर फक्त रोग प्रतिकार शक्तीचं औषध असल्याच्या स्पष्टीकरणानंतरही कोरोनिलने कोट्यवधी रुपयांचा व्यवसाय केलाय. कोटीच्या कोटी उड्डाणं घेणाऱ्या कोरोनिलनं कसा केलाय विक्रमी व्यवसाय. पाहूयात सविस्तर रिपोर्टमधून.

कोरोनावर लस शोधण्याचे प्रयत्न जगभरात सुरू असतानाच रामदेव बाबा यांच्या पतंजली कंपनीने बक्कळ कमाई केलीय. कोरोनावरचं औषध म्हणून कोरोनिल लॉन्च करण्यात आलं मात्र, त्यावरून अनेक वाद झाले. त्यानंतर पतंजलीने कोरोनिल कोरोनावरचं औषध नसून रोग प्रतिकारशक्ती वाढण्यासाठी उयुक्त असल्याचं स्पष्टीकरण दिलं होतं. याच वादाच्या गर्तेत अडकूनही कोरोनिलच्या माध्यमातून पतंजलीने कोट्यवधी रुपयांचा व्यवसाय केलाय.

पतंजलीच्या कोरोनिल औषधांची मोठ्या प्रमाणात विक्री झालीय. अवघ्या 4 महिन्यांत तब्बल 241 कोटी रुपयांचा व्यवसाय पतंजलीने केलाय. महत्त्वाचं म्हणजे कोरोनिल औषधाचे तब्बल 85 लाखांहून अधिक किट विकले गेले आहेत. 
 

कोरोनाच्या संकटात रोग प्रतिकारशक्ची वाढवण्यासाठी प्रत्येकजण प्रयत्न करत होता. आहारात बदलही केले गेले. त्यामुळेच, वादात सापडूनही कोरोनिलची विक्रमी विक्री झालीय. त्यामुळे, योग साधना शिकवणाऱ्या रामदेवबाबांनी साधलेला यशस्वी व्यवसायाचा बाजारयोग चर्चेचा विषय ठरलाय.
 

आता बातमी दिवाळीच्या तोंडावर अत्यंत महत्त्वाची. दिवाळी म्हटलं की उत्साहाचं उधाण आणि फराळाची रेलचेल. पण यंदाच्या दिवाळीला कोरोनाच्या संकटाची किनार आहे. त्यामुळे फराळ तुमचं आरोग्य बिघडवू शकतो... म्हणून फराळ खाताना काय काळजी घ्यायला हवी. पाहूयात.

दिवाळी म्हटलं की उत्साहाला उधाण आणि फराळाची रेलचेल. पण, इतर सणांप्रमाणेच यंदाच्या दिवाळीलाही कोरोनाची काळी किनार आहे. त्यामुळे, दिवाळीचा फराळ खात असाल तर अधिकची काळजी घेण्याची गरज आहे. कारण, आरोग्याला अपायकारक असणाऱ्या आणि कोरोनाला पोषक ठरू शकतील अशा गोष्टी टाळणं अत्यंत गरजेचं आहे.

• अनारसे, शंकरपाळी, ओल्या नारळाच्या करंज्या, रव्याचे पदार्थ, गव्हाच्या पिठाचे पदार्थांमुळे वाताचा त्रास होण्याची शक्यता
• मिश्र डाळींचे पदार्थ, मैद्याचे पदार्थ, मुगाचे लाडू, पोह्यांचा चिवडा, चकलीमुळे पित्त वाढण्याची भीती असते.
• शेव, कडबोळी, तिखट शंकरपाळ्यांमुळे कफाचा त्रास वाढण्याची शक्यता नाकारता येत नाही.
   
• दिवाळीतला फराळ अशा पद्धतीने त्रासदायक ठरू शकतो, मात्र फराळ नसेल तर दिवाळी कसली? त्यामुळे दिवाळीचा फराळ करताना काही घरगुती उपाय केले तरी, त्रासांपासून सुटका होऊ शकते.

फराळ खाताना काळजी घ्या

दिवाळीचा फराळ करताना वरचेवर कोमट पाणी प्यायला हवं. त्याचसोबत पित्तप्रकृती, वातप्रकृती असणाऱ्या आणि मधुमेह असणाऱ्या व्यक्तींनी डॉक्टरांच्या सल्ल्यानेच फराळ करायला हवा. दिवाळीचा फराळ करणाऱ्यांनी व्यायामावरही भर देण्याची गरज असून, दुकानातील मिठाई, चॉकलेटचा अतिरेक टाळायला हवा. 

सणासुदीत खाण्याची चंगळ असते, पण मंडळी, यंदाची दिवाळी मात्र कोरोनाच्या संकटात साजरी होणारेय. कारण, कोरोनाचा राक्षस आ वासून बसलाय. त्यामुळे, दिवाळीत फराळ खाताना अधिकची काळजी घेण्याची गरज आहे. कारण, दिवाळी हा प्रकाशाचा सण आहे, म्हणून आरोग्याचा दिवा घरोघरी तेवत ठेवायला हवा.

संजय दत्त... बाबा, संजूबाबा... अशी अनेक नावं... पण तो त्याच्या नावाने किंवा चित्रपटांनी जितका ओळखला जातो, तितकाच त्याच्या आयुष्यातील चढ-उतारांवरून जास्त ओळखला जातो.  म्हणून तर त्याच्या आयुष्यावर चित्रपट आला आणि सुपर-डुपर हिटही ठरला. 29 जुलै 1959 साली जगात पाऊल ठेवताना संजूबाबा अभिनयाचा चमचा तोंडात घेऊनच जन्मला.  वडील सुनील दत्त आणि आई नर्गिस दत्त. लाडाकोडात वाढलेला संजू हाहा म्हणता मोठा झाला. अभिनेत्या आई-वडिलांचाच मुलगा तो. सिनेमात येणारच ना. त्याचा

पहिला सिनेमा रॉकी. 26 एप्रिलला रीलीज झाला. संजूबाबा आनंदात होता. पण... एक घटना घडली संजूबाबा कोसळून गेला. 3 मे 1981 रोजी संजूबाबाची आई सुप्रसिद्ध अभिनेत्री नर्गिस दत्त यांचं कॅन्सरने निधन झालं. आयुष्यातला पहिला सिनेमा रीलीज झाला पण जन्मदाती आई जग सोडून गेली. संजूबाबा खचून गेला. सिगारेट, दारूसह संजूबाबा ड्रग्जच्याही आहारी गेला. त्याचं व्यसन सुटावं म्हणून त्याला अमेरिकेत पाठवलं गेलं. उपचारानंतर संजूबाबा भारतात आला आणि पुन्हा सुरू झाला अभिनयाचा प्रवास. 

 त्यातच 1987 साली लग्न केलेल्या रिचा शर्माचा ब्रेन ट्युमरने मृत्यू झाला. या संकटातून संजय दत्त बाहेर पडतोय न पडतोय तोच. 1993 साली मुंबईत बॉम्बस्फोट झाले. आणि संजय दत्तच्या आयुष्यातही मोठा खड्डा पडला. बेकायदा शस्त्र बाळगल्याप्रकरणी संजय दत्तला अटक झाली. 

जामिनावर असताना रिया पिल्लईसोबत लग्न केलं पण ते टिकलं नाहीच. घटस्फोट झाला.  ज्यांनी सर्वात मोठा आधार दिला त्या सुनील दत्त यांचं 2005 साली निधन झालं. त्यानंतर मात्र संजय दत्त एकाही लढत राहिला. 

अनेक सिनेमे केले. हिट झाले. नवी सोबत म्हणून मान्यता दत्तसोबत संजूबाबानं लग्न केलं. या सगळ्यात संजय दत्तची सुटकाही झाली. सगळं काही ठीकठाक चाललं असतानाच संजूबाबाला कॅन्सरचं निदान झालं.

आई, पहिली पत्नी आणि आता स्वत: संजय दत्त. कॅन्सरचा शाप तिघांनाही.  पण अनेक संकटांना लोळवणारा संजूबाबा खचला नाहीच. खरतनाक आजाराच्या छाताडावर पाय देऊन संजूबाबानं कॅन्सरला हरवून टाकलंय.  खुद्द संजय दत्तनेच ट्वीट करून ही बातमी दिलीय.

नुसता आवाज ऐकला तरी चेहऱ्यासमोर उभा राहतो बिनधास्त. रांगडा, खतरनाक, भावनिक अशा सगळ्यांचं मिश्रण असलेला संजू बाबा. कधी डोळ्यांतून टचकन् पाणी यावं, कधी मुठी आवळून संजूबाबाचा राग यावा, तर कधी त्याच्याबद्दल दया वाटावी असं त्याचं आयुष्य आहे.

संजूबाबा कसाही असला तरी लोकांनी त्याला भरभरून प्रेम दिलं. त्यामुळेच संजूबाबाने ट्वीट करून डॉक्टर आणि चाहत्यांचे आभार मानलेयत. असंख्य संकटांची सडक पार करणारा संजय दत्त म्हणूनच आजही मोठ्या अभिमानाने रसिकांसमोर नतमस्तक होतो.
 

सोलापूर जिल्ह्यात पावसाचा धुमाकूळ सुरूं आहे. पावसानं विठुरायाच्या पंढरीलाही सोडलेलं नाही. चंद्रभागेला तब्बल 13 वर्षानंतर पूर आलाय. या पुरानं अनेकांचे संसार उध्वस्त केलेत. 

पंढरपूरचा विठ्ठल म्हणजे महाराष्ट्रातल्या तमाम भाविकांचं श्रद्धास्थान. इथली चंद्रभागा म्हणजे भाविकांसाठी पवित्र गंगा. पण याच चंद्रभागेनं रौद्ररूप धारण केलंय. 

मुसळधार पावसामुळे उजनी, वीर आणि नीरा धरणातून तब्बल तीन लाख क्युसेक पाणी सोडण्यात आलंय. त्यामुळे चंद्रभागेला तब्बल 13 वर्षानंतर पूर आलाय. 

नदीचं पाणी किनाऱ्यावरच्या वस्त्यांमध्ये शिरलंय. त्यामुळे नागरिकांमध्ये भीतीचं वातावरण आहे. बाजारपेठेतील तळमजल्यांमध्ये मोठ्या प्रमाणात पाणी शिरल्याचं चित्र पाहायला मिळतंय

पाहा, साम टीव्हीचा ग्राऊंड झिरो रिपोर्ट 

लोकांना सुरक्षित स्थळी हलवण्यासाठी शर्थीचे प्रयत्न सुरू आहेत. या बोटी पाहिल्यानंतर कुणाला विश्वासही बसणार नाही की इथूनच दोन दिवसांपूर्वी वाहनं धावत होती. 

पाण्यामुळे पंढरपूरहून बाहेर जाणारी वाहतूक पूर्णपणे बंद करण्यात आलीय. सातारा, पुणे, सोलापूर आणि विजापूरला जाणारे रस्तेही बंद करण्यात आले आहेत. 

पंढरपूरच्या प्रदक्षिणा मार्गावर पाणीच पाणी असल्यामुळं इथल्या नागरिकांना घराबाहेर पडता येत नाहीय. याच भागात बंकटस्वामी मठाजवळील एका घरात वृध्दाचा मृत्यू झाला होता. पाणी असल्यानं मृतदेह बाहेर काढणं शक्यच नव्हतं. अखेर कोल्हापूर मधून आलेल्या वजीर रेसक्यू फोर्सच्या मदतीनं हा मृतदेह बाहेर काढला...

परतीच्या पावसानं सर्वात जास्त हवालदिल झालाय. तो बळीराजा...या पावसानं हातातोंडाशी आलेला घास हिरावून घेतलाय. माढा तालुक्यातील एका शेतकऱ्यानं अपार मेहनतीनं उभी केलेली रोपवाटिका भुईसपाट झालीय.  

आता पाऊस कमी झाल्यानं पाणी हळूहळू ओसरतंय. पण या पुरानं शेतकऱ्यांच्या, सर्वसामान्यांच्या मनावर जे घाव केलेत ते कधीही भरून येणार नाहीत. 
 

 तुम्ही कोरोनाची चाचणी केली असेल किंवा करणार असाल तर ही बातमी पुर्ण वाचा. तुम्हाला अनेक प्रश्न पडतील. शिवाय कोरोना चाचणी करतानाही खूपदा विचार कराल. कारणंही तसंच आहे.

हा रिपोर्ट पाहा आणि कोरोना चाचणी करताना काळजी घ्या.

तुम्ही कोरोनाची चाचणी करताय तर वेळीच सावध व्हा. तुमचा रिपोर्ट बरोबर येईल याची खात्री नाही. कारण, राज्यात तब्बल साडे बारा लाख आरटीपीसीआर किट्स बोगस असल्याचं समोर आलंय. त्यामुळे तुम्ही केलेल्या चाचण्यांचा रिपोर्ट काय येईल ते सध्या सांगता येत नाही. बोगस किट्स राज्यात वितरित झाल्याची माहितीच खुद्द आरोग्यमंत्री राजेश टोपे यांनीच दिलीय.

जीसीसी बायोटेक कंपनीच्या आरटीपीसीआर किटस् लो पॉझीटीव्हीटी रेट आढळून आलाय. या बोगस किट्सचा वापर तातडीने थांबवण्यात आलाय. किट्स वितरित करणाऱ्या GCC बायोटेक लिमिटेड कंपनीवर कारवाई करणार असल्याची माहिती आरोग्यमंत्र्यांनी दिलीय. पण, चाचणी चुकीची आली असेल त्यांचं काय? एखाद्या पॉझिटीव्ह रुग्णाची चाचणी निगेटीव्ह आली असेल तर त्या रुग्णाच्या संपर्कात आलेल्यांचं काय? त्या रुग्णापासून किती जण कोरोनाबाधित झाले असतील? असे अनेक प्रश्न उपस्थित होतायत.

आता यावर चौकशी होईल, कंपनीवर कारवाई करतील हे आता सगळं होईलच. पण, अशा बोगस किट्सने चाचणी करणं कितपत योग्य ? त्यामुळे तुम्ही योग्य ठिकाणीच चाचणी करा आणि आरोग्याची काळजी घ्या.

बातमी तुमच्या आमच्या कामाची. महाराष्ट्रातील ग्राहक महागाईमुळे होरपळून निघालेयत. कारण भाज्यांपाठोपाठ आता डाळी आणि तेलही प्रचंड महागलंय. आधीच कोरोनाचं संकट आणि त्यात या महागाईमुळे सर्वसामान्य ग्राहकांच्या खिशाला कात्री लागलीय.

गेल्या काही दिवसांपासून भाज्यांचे दर गगनाला भिडलेत. त्यातच आता तेल आणि डाळींचे दरही कमालीचे वाढलेत. त्यामुळे सर्वसामान्यांचं बजेट अक्षरश: भरडून निघालंय. अवघ्या 25 दिवसांत तेल आणि कडधान्याचे दर मोठ्या प्रमाणात वाढलेत.

डाळींच्या दरांनी बडेट भरडलं
तूरडाळ १२८ ते १३०, तर उडीदडाळ ११५ ते ११८ रुपये किलो विकली जात आहे.
डाळींसह तेलाचे दरही ग्राहकांच्या खिशाला कात्री लावत असल्याचं दिसून येतंय.

तेल महागाईच्या कढईत
सूर्यफूल तेलाचे दर 120 ते 130 रुपयांवर पोहचले असतानाच सोयाबीन तेलाचे दरही 110 ते 120 रुपयांवर गेले आहेत. त्याचप्रमाणे शेंगतेल 140 ते 150 रुपयांवर पोहोचलेत. आणि पामतेलाचे दरही आता 90 ते 110 रुपयांवर गेलेत, तर इकडे रोज लागणाऱ्या भाज्यांचे दरही प्रचंड वाढल्याने गृहिनींना तारेवरची कसरत करावी लागतेय. 
 
भाज्यांचे दर गगनाला भिडले
बाजारात वाटाणा 120 रु किलो, तर कोबी 50 रुपये किलोवर पोहोचलाय. त्याचप्रमाणे वांगी 50 रु किलो तर, फ्लॉवर 60 रुपये किलोने बाजारात मिळतोय. कोथिंबीरीची जुडी 25 रुपयांना मिळू लागलीय. त्याचप्रमाणे भेंडी 30 रुपये किलो आणि गवारीचे दर प्रतिकिलो 80 रुपये झालेयत.

खरंतर, लॉकडाऊनमध्ये सर्व उद्योग ठप्प असताना शेतीक्षेत्र मात्र मोठ्या जोमाने सुरू होतं. मात्र परतीच्या पावसाने शेतीचं मोठं नुकसान झालं आणि डाळी, भाज्यांचे दर वाढले. मात्र असं असलं तरी, काही व्यापाऱ्यांची साठेबाजीही या दरवाढीला कारणीभूत असल्याचा संशय व्यक्त होतोय. त्यामुळे सरकारने या साठेबाजांना वेळीच अद्दल घडवून ग्राहकांना आणि शेतकऱ्यांनाही दिलासा द्यायला हवा.