भाजप आमदाराला सायबर चोरांचा गंडा; खात्यातून लाखो रुपये लंपास

: मध्य प्रदेशातील भाजप आमदाराला सायबर चोरट्यांनी लाखो रुपयांना गंडा घातला आहे. चोरट्यांनी आमदाराच्या बँक खात्यातून लाखो रुपये काढून घेतले. १९ दिवसांत त्यांनी चार लाख रुपयांहून अधिक रक्कम खात्यातून काढल्याचं तपासात उघड झालं आहे. मध्य प्रदेशातील सिवनी येथील दिनेश राय मुनमुन यांच्या बँक खात्यातून ४ लाख ५१ हजार रुपये चोरट्यांनी काढले आहेत. या प्रकरणी आमदार मुनमुन यांनी लखनादौन पोलीस ठाण्यात तक्रार दाखल केली आहे. सायबर विभागाकडून या प्रकरणाची चौकशी करण्यात येत आहे. तक्रारीनुसार, आमदारांच्या खात्यातून सायबर चोरट्यांनी ४ लाख ५१ हजार ४६५ रुपये काढले आहेत. नेट बँकिंगद्वारे ही रक्कम ११ एप्रिल ते ३० एप्रिलदरम्यान काढण्यात आली. आपल्या खात्यातून लाखो रुपये काढल्याचे त्यांना १ मे रोजी समजले. कारचा विमा काढण्यासाठी त्यांना संबंधित एजंटना धनादेश द्यायचा होता. त्याआधी त्यांनी बँकेकडून स्टेटमेंट मागवला होता. स्टेटमेंट पाहिल्यानंतर त्यांना धक्काच बसला. त्यांच्या दोन्ही बँक खात्यातून लाखो रुपये काढण्यात आले होते. सायबर सेलनं या प्रकरणी तपास सुरू केला आहे. सायबर चोरट्यांनी वेगवेगळ्या दिवशी या पैशांतून खरेदी केल्याचे स्पष्ट झाले आहे. बँक खात्याशी जोडलेल्या मोबाइल क्रमांकावर पाठवलेल्या ओटीपीच्या आधारे त्यांनी नेट बँकिंगद्वारे खरेदी केल्याचे समोर आले आहे. विशेष म्हणजे खरेदी झाल्यानंतर आमदारांच्या मोबाइलवर ओटिपी पाठवण्यात आलेला नाही. सायबर चोर हे आसाममधील असल्याचे तपासात उघड झाले आहे. लुटलेली रक्कम कुठे खर्च करण्यात आली आहे, याचाही तपास लागला आहे. सायबर पोलिसांच्या अहवालानंतर सिवनी पोलीस चोरट्यांना लवकरच बेड्या ठोकतील असे सांगण्यात येत आहे. ज्येष्ठाची फसवणूक दरम्यान, सायबर चोरीच्या घटनांमध्ये गेल्या काही दिवसांमध्ये वाढ झाली आहे. पुण्यातील एका सेवानिवृत्त ज्येष्ठ नागरिकालाही सायबर चोरट्यांनी लाखो रुपयांचा गंडा घातल्याचा प्रकार उघड झाला आहे. पेटीएम अपडेट करण्याच्या नावाखाली त्यांनी या ज्येष्ठ नागरिकाच्या खात्यातून १ लाख ११ हजार रुपये काढले. संजीव खत्री यांनी या प्रकरणी बिबवेवाडी पोलीस ठाण्यात तक्रार दिली. खत्री हे एका खासगी कंपनीमधून सेवानिवृत्त झाले आहेत. सायबर चोरट्याने त्यांना मेसेज केला आणि पेटीएम केवायसी अपडेट करण्यासाठी मोबाइलवर संपर्क करण्यास सांगितले. अन्यथा पेटीएम खाते बंद होईल असेही सांगितले. खत्री यांनी संबंधिताच्या मोबाइल फोनवर संपर्क केला. त्यानंतर सायबर चोरट्यांनी सांगितल्याप्रमाणे खत्री यांनी त्यांना एक रुपया ऑनलाइन ट्रान्सफर केला. तसेच चोरट्यांनी त्यांच्या बँक खात्याची माहिती विचारून त्यांच्या खात्यातील एक लाख ११ हजार रुपये काढून घेतले. बँक खात्यातून रक्कम कमी झाल्याचा मेसेज आल्यानंतर आपली फसवणूक झाल्याचे त्यांच्या लक्षात आले.