'...त्यांची नावे महाराष्ट्राच्या इतिहासात डांबराने लिहिली जातील'

मुंबई: 'राजकीय अजेंडे पुढे नेण्यासाठी देशद्रोही पत्रकार, सुपारीबाज कलावंताच्या राज्यद्रोहास पाठिंबा देणे ही मातीशी बेइमानीच आहे. महाराष्ट्रातील बेइमानांच्या पाठीशी जे उभे राहात आहेत, त्यांना १०६ हुतात्म्यांचे तळतळाट लागतीलच, पण राज्याची ११ कोटी जनताही माफ करणार नाही. ‘मुंबाई’ मातेचा अवमान करणाऱ्यांची नावे महाराष्ट्राच्या इतिहासात डांबराने लिहिली जातील,' अशी घणाघाती टीका शिवसेनेनं केली आहे. मुंबई व मुंबई पोलिसांबद्दल अपमानास्पद वक्तव्य करणाऱ्या हिच्याविरोधात सध्या राजकीय वातावरण तापलं आहे. केंद्रातील सत्ताधारी भाजपनं कंगनाला सुरक्षा दिल्यानं भडकली आहे. पक्षाचे मुखपत्र दैनिक 'सामना'च्या आजच्या अग्रलेखातून शिवसेनेनं भाजपवर जोरदार तोफ डागली आहे. वाचा: 'मुंबईचा अवमान हा महाराष्ट्रातील ११ कोटी जनतेला देशद्रोहासारखा गुन्हा वाटतो. असा गुन्हा करणाऱ्या व्यक्तीच्या मागे राष्ट्रभक्त मोदी सरकारचे गृहमंत्रालय सुरक्षा कवच घेऊन ठामपणे उभे राहते तेव्हा आपले १०६ हुतात्मेही स्वर्गात अश्रू ढाळत असतील. महाराष्ट्र हा सत्यवादी हरिश्चंद्राचा पूजक आहे. मऱ्हाटी जनांशी बेइमानी करणाऱ्या विकृतांशी मराठी माणूस सतत लढत राहिला. कोणीही यावे आणि महाराष्ट्राच्या मऱ्हाटी राजधानीवर टपली मारावी, कोणीही ऐऱ्यागैऱ्याने उठावे आणि महाराष्ट्राच्या मुख्यमंत्र्यांचा एकेरी उल्लेख करून आव्हानाची भाषा करावी या विरोधात संपूर्ण महाराष्ट्राने एकवटायला हवे. पण भाजप मुंबईचा आणि राज्याच्या मुख्यमंत्र्यांचा अवमान करणाऱ्यांना सरळ पाठिंबा देत आहे. महाराष्ट्रावर नशेच्या पिचकाऱ्या टाकणाऱ्या व्यक्तीला केंद्र सरकार विशेष सुरक्षेच्या पालखीचा मान देत आहे. मुंबादेवीचा हा अवमान ज्यांना प्रिय आहे असे लोक दिल्लीत आणि महाराष्ट्राच्या विधिमंडळात बसले आहेत म्हणून मुंबईचा धोका कायम आहे, असा सावधानतेचा इशारा शिवसेनेनं मराठी माणसाला दिलाय. 'मुंबईला आधी बदनाम करायचे, नंतर खिळखिळे करायचे. मुंबईस संपूर्ण कंगाल करून एक दिवस ती महाराष्ट्रापासून तोडायची या कारस्थानाची पावले नव्याने पडू लागली आहेत हे आता स्पष्ट दिसत आहे. महाराष्ट्रातील लोकनियुक्त सरकारच्या अधिकारावर आणि स्वातंत्र्यावर हल्ले करण्याची एकही संधी महाराष्ट्रातील भाजपवाले आणि केंद्र सरकार सोडत नाही. अहमदाबाद, गुरगाव, लखनौ, वाराणसी, रांची, हैदराबाद, बंगळुरू, भोपाळ अशा शहरांबद्दल अवमानजनक विधान एखाद्याने केले असते तर केंद्राने ‘वाय सुरक्षे’ची पालखी त्या व्यक्तीस दिली असती काय, हे महाराष्ट्रातील भाजपच्या मंडळींनी स्पष्ट करावे,' असं आव्हानच शिवसेनेनं दिलं आहे. 'देवेंद्र फडणवीस, पंतप्रधान मोदी किंवा गृहमंत्री शहा यांचा ‘एकेरी’ नावाने उद्धार करणाऱ्या टिनपाट वृत्तवाहिनीच्या मालकास भाजपवाल्यांनी असा पाठिंबा दिला असता काय? आज ज्या पद्धतीने हे समस्त भाजपवाले महाराष्ट्रद्रोह्यांच्या पाठीशी ठामपणे उभे राहिले आहेत, तो ठामपणा आपल्या हद्दीत घुसलेल्या चिनी माकडांच्या बाबतीत दाखवला असता तर लडाख, अरुणाचलच्या सीमेवर देशाची बेइज्जती झाली नसती,' असा टोलाही अग्रलेखातून लगावण्यात आलाय.