लॉकडाउन संपल्यावर मी घरी येईन... शहीद जवान दीपरकुमारने दिला होता शब्द

रीवा: लडाखमधील गलवान खोऱ्यात भारत आणि चीनच्या सैनिकांमध्ये झालेल्या हिंसक हाणामारीत २० भारतीय जवान शहीद झाले. आपल्या प्राणांची आहुती देणाऱ्या या शूर जवानांमध्ये मध्य प्रदेशातील जवान दीपककुमार सिंह यांचाही समावेश होता. दीपक यांनी लडाखमध्ये कर्तव्यावर रुजू होण्याच्या काही दिवस आधी कुटुंबीयांशी संवाद साधला होता. करोनाचा प्रकोप आणि लॉकडाउन संपल्यानंतर मी घरी येईन, असा शब्द त्यांनी आपल्या कुटुंबीयांना दिला होता. मात्र, हा कुटुंबीयांशी आपण साधत असलेला संवाद आपला शेवटचा संवाद असेल याची त्यांना कल्पना कुठे होती...! दीपककुमार सिंह हे मध्य प्रदेशातील रीवा जिल्ह्यातील रहिवासी होते. त्यांचे लग्न फक्त ७ महिन्यांपूर्वीच झाले होते. ३० वर्षीय दीपक यांनी काही दिवसांपूर्वीच आपल्या कुटुंबीयांशी संवाद साधला होता. हा लॉकडाउन संपल्यानंतर मी सु्ट्टी काढून घरी येईल असे त्यांनी आपली आजी फूलकुमारी यांना सांगितले होते. सीमेवर काय घडले याची माहिती त्यांच्या कुटुंबीयांना मिळताच त्यांच्या गावात दु:खाची छाया पसरली. मी त्याच्याशी काही दिवसांपूर्वीच बोलले आणि लॉकडाउन संपल्यानंतर लगेचच मी सु्ट्टी घेऊन घरी येईन असे त्याने मला सांगितले. मात्र लॉकडाउन संपला आणि त्याच्या निधनाचीच बातमी आली, असे ८५ वर्षीय त्यांची आजी फूलकुमारी यांनी सांगितले. दीपक यांच्या आईचे गेल्या वर्षी निधन झाले. त्यानंतर दीपक यांची देखभाल त्यांच्या आजीनेच केली. फूलकुमारी यांना रडू आवरत नव्हते. त्या रडत रडत सांगत होत्या... 'तो माझ्या खूपच लाडका होता, तो खूप चांगला होता. तो सर्वांवर प्रेम करायचा आणि घरातील सर्वांचा तो आदर करायचा. तो सर्वांचाच प्रिय झाला होता.. सर्वांना तो आवडायचा.' शहीद दीपक सिंह याचे लग्न गेल्या वर्षी ३० नोव्हेंबरला झाले होते. त्यांची पत्नी रेखा सिंह या मध्य प्रदेशच्या सिरमौर येथील नवोदय विद्यालयात नोकरी करत असत. दीपक यांनी सन २०१३ मध्ये लष्करात पदार्पण केले होते. ते बिहार रेजिमेंटचे जवान होते. त्यांची पोस्टींग गलवान खोऱ्यात होती. त्यांचे वडील गजराज सिंह हे शेतकरी आहेत. दीपक यांचे मोठे बंधू प्रकाश हे देखील लष्करात आहेत. आता ते राजस्थानातील जैसलमेर येथे तैनात आहेत. मध्य प्रदेशचे मुख्यमंत्री शिवराजसिंह चौहान, माजी मुख्यमंत्री कमलनाथ यांच्यासह अनेक मोठ्या नेत्यांनी शहीद दीपककुमार यांना श्रद्धांजली अर्पण केली आहे.